كتب: عمر ربيع
اكتب عن ايه ...؟!
عن نفسي اللي غِلبت أرضيها؟!
اكتب ولمين ...؟!
عن بنت بخون طين أرضيها!
اكتب وازاي ...؟!
بالذمة كلامي هيرضيها!
اكتب.......والشوق؟!
عن لهفة فِ عيني بخبيها!!!
اكتب للبنت اللي سابتني
اكتب للخيبة اللي صابتني
اكتب للبطن اللي جابتني
علشان اتعذب ف الدنيا
اكتب ع الفقر اللي بعيشه
محبوس ف الساعة وف الثانية
اكتب ع الغيط والدنيا عمار
اكتب ع الحيط نص الاسرار
اكتب عن لمة بتجمعنا...
وترجع تاني الروح للدار
اكتب عن خير كان بيساعنا
واللعب الحاصل ف الاسعار
اكتب ع الشغل اللي بروحه
والجرح معلم فِ كتافي..
اكتب عن علة ف يوم صابت
والدوا بسم الله وبالشافي..
اكتب ع البرد اللي لفحني
علشان قصرت مع لحافي..
اكتب ع الكورة في حوارينا
والكل لزوم يلعب حافي...
اكتب عن جول كان فرحنا
كان جابه محمد عبشافي..
اكتب عن صاحبي اللي ضربني
واتغابي عليا فزعلته..
اكتب عن منسي اللي استُشهد
والالف بضافر رجالته...
اكتب ع الليل
اكتب ع الجرح اللي ف قلبي
وببل بدمعي 200 منديل
اكتب ع الست واغانيها
اكتب عن رامي اللي عشقها
وان طلبت عمره هيديها...
اكتب لسعاد ونجاة وحليم
واضحك علي سُمعه فِ فيلم قديم
اكتب عن فرقة بشجعها
وهتافي يخليّ الروح عالية
اكتب عن حُمص وحلاوته
والجول الخالد في ايطاليا...
اكتب ع المانجا و ع التفاح..
اكتب علي كل اللي ارتاح..
اكتب عن الاوطان
وانا وطني مش ليا
اكتب عن الاحلام
وارسمها ... وردية..
اكتب عن الماضي
اكتب عن الحــاضر
اكتب عن اللي يكون
عَ البال و عَ الخاطر
اكتب عن الجنة
واتمني اكون فيها
اكتب كتابي واقطعه
وارميه ف حته تكون بعيد
افتح صباحي بوحدتي
يمكن ساعتها ارجع سعيد..
عظمه يا عمر 💖👏
ردحذفبالتوفيق والنجاح الدائم يارب💖💖
جامد ي عمر بجد
ردحذفاستمر يسطا♥️